माझी फ्रेशर्स पार्टी

कालच्या रविवारी मी फ्रेशर्स पार्टीला गेलो होतो.

तुम्ही म्हणाल, ” म्हणजे हा आता नक्कीच एखाद्या पोलीस कोठडीत खितपत पडला असेल.”

पण नाही मित्रांनो ! मी घरीच आहे आणि हा ब्लॉग लिहितोय.

थेऊरच्या पार्टीला ‘ फ्रेशर्स पार्टी ‘ असं कल्पक नाव देणारे तरुण वाया गेलेले असतील, असं म्हणणं किती शहाणपणाचं आहे ?

‘ पार्टी ‘ मग ती कशाचीही असो. अगदी चहाची, भज्याची, डिनरची किंवा कॉकटेल डिनरची. ती पार्टी आपण आपल्या जिवाभावाच्या मित्र – मैत्रिणीन सोबत मस्त एन्जॉय करावी. गप्पा माराव्यात, टाळ्या द्याव्यात, टाळ्या घ्याव्यात, एखाद्याची मस्त फिरकी घ्यावी, कुणीतरी लटक रागवाव, आपण मात्र खूप सिरिअस होऊन त्याची समजूत काढावी…..आणि त्यांना खो खो हसत म्हणावं, ” काय उल्लू बनवला मी तुला. अरे, असं रुसायला मी काही अगदीच बाळ्या नाही.” एवढ सारं झाल्यानंतर मस्त शीळ घालत घरी परतावं.
त्या तरुणांच्या डोक्यातही असेच विचार असावेत. पण आमच्या मिडिया बहाद्दरांनी त्या पार्टीला पार गटारगंगेत बुडवलं आणि त्या तरुणाईचं जगणं अधिकच अवघड करून टाकलं

ते जाऊ द्या. मी माझ्या फ्रेशर्स पार्टीविषयी लिहित होतो. मी फ्रेशर्स पार्टीलाच गेलो असं मी मानतो. कारण तिथून परतताना मी अगदी मनातून फ्रेश होऊन गुणगुणत घरी परतलो होतो.

खरंतर पार्टी नव्हतीच ती. ‘ कधी वाटते ‘ हा मराठी गाण्यांचा  कार्यक्रम होता. रसिकांनी त्यापूर्वी कधीही न ऐकलेल्या, ‘ देवेंद्र भोमे ‘ या पंचविशीच्या तरुणांना संगीतबद्ध केलेल्या मराठी गीतांचा, हिंदी गझलांचा हा कार्यक्रम. मी लिहिलेल्या काही गाण्यांचाही त्यात समावेश होता-

‘ रे घना थांब ना, प्रिया कुठे सांग ना ‘,

‘ भिरभिरणारे वारे श्वासात भरुनी घ्या रे,

कधी सा, रे, ग, म, ग, कधी ढिंग, चांग, मचाळांग गा रे ‘

हि मी लिहिलेली त्यातली काही गाणी. ‘

‘ भिरभिरणारे वारे ‘ ला रसिकांनी ज्या रितीनं ठेका धरून प्रतिसाद दिला ते पाहताना माझ्या डोळ्यात पाणी आलं.  आपलं बाळ नुकतंच स्वतःच्या पायावर उभं राहून चालताना पाहून आईच्या डोळ्यातही पाणी येत ना तसंच माझ्या डोळ्यातही पाणी आलं. आईच्या डोळ्यातल्या त्या पाण्याचा आणि त्या क्षणी माझ्या डोळ्यात आलेल्या पाण्याचा धर्म एकाच असावा असं वाटलं मला तेव्हा.

प्रत्येक रसिकांना तो कार्यक्रम पहायलाच हवा. पण प्रत्येक पुणेकरानंही नक्कीच पाहायला हवा. पण प्रत्येक तरुणानं तर पुन्हा पुन्हा पहायला हवा.  माझी गाणी त्यात आहेत म्हणून नाही सांगत. थेऊरच्या पार्टीत एकत्र आलेल्या तरुणांसारखेच काही  तरुण एकत्र येतात आणि किती सुरेख कार्यक्रम करतात ते सारयांना कळावं म्हणून. अर्थात थेऊरच्या पार्टीचा सतत आठ दिवस पाठपुरावा करणारे आमचे मिडीयावाले त्या तरुणांकडे लवकर वळून पहाणार नाहीत हे मात्र खरं.

वीस – बावीस तरुणांनी एकत्र येऊन साजरा केलेला तो सोहळा. त्याविषयी सविस्तर नंतर लिहीन.

पण आज हे सारं लिहीव वाटलं, कारण कार्यक्रमाहून परतताना हे सारे विचार माझा पाठपुरावा करत होते. वाटलं या तरुणांची हि ‘ फ्रेशर्स पार्टीच नाही काय ?

थेऊरच्या पार्टीत सहभागी झालेल्या तरुणांना असा एखादा कार्यक्रम दाखवून सांगायला हवं, ” मित्रांनो, तुमच्यासारखे हे तरुण. हे जर इतकं सुरेख काही करू शकतात, तर तुम्ही नाही का असं काही करू शकणार !”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s